Скъодтати Эльбруси нæуæг агъаззаг поэтикон æмбурдгонди «Цæун и Дуйнеййи» сæйраг темæ æй цардбæл, рæстæгбæл æма Зæнхæбæл адæймаги нисанбæл философон гъудитæ.
Астæугкаг бунат си, æнæмæнгæ, ахæссуй адæймаг. Е æй зæнхæбæл тæккæ тухгиндæр исфæлдесонд, æхуæдæг фæлдесæг ка ‘й, æма берæ егъау фæндитæ ка исæцæг кæнуй. Фал, иннердигæй ба, адæймаг æй æрдзи тæккæ лæмæгъдæр фæлдесонд дæр – листæг синдзæ, кенæ хумæтæг æхснирсæг ин е ‘нæнездзийнадæ фæккеун кæндзæнцæ, сауæнгæ ма ин æ цард дæр байссæнцæ, æхе къохæй ба, раздæр ци дессæгтæ исаразуй, уони нийхалуй. Етæ зин лæдæрæн æнцæ, фал уæддæр фæлгæсæг-поэтæй ируагæс кæнуй, хуарздзийнадæ алкæддæр ке фæууæлахез уодзæй, е, дзиллæ ба, уæдта алли адæймаг дæр балæдæрдзæнцæ рагфиддæлти хуарз зундрахаст, æма Зæнхæн тугъдтитæ ‘ма техногенон устур бæллæхтæй бауолæфунæн мадзæлттæ иссердзæнцæ, цæмæй ин кæдзосуод, кæдзосгъуди сувæллæнттæ табу кæнонцæ, æма ин тас æма мастæй цæстисуг калгæ кæми нæ уа, уæхæн дуйне исараздзæнæнцæ.
Поэтæн æ лирикон хъайтар уайуй æ «бæхбæл» Дуйнеййи æма фæстагмæ исуй еци Дуйнеййæн æ еу хай. Уой уотæ балæдæрæн ес, ‘ма, адæймаг, æхемæ баргун ка кæсуй, е æй, кæронмæ базонæн ци дуйнеййæн нæййес, уой листæг хайæг. Æрдзи «бæдоли» æмир æма «хуæдæвзаг» æвдесæн, æ уæлахези æма æ рæдудтити «уацфинсæг» ба æй дор – уæлзæнхон æма дæлзæнхон «уацхæссæг».
Идарддæр автор æ мадтæлон дигорон дзурдæй æносон «хе агоруни» нисæнттæ «хузæ кæнуй», аразуй æ райгурæн бæсти æхегъæдон сорæттæ, хе хузи райхалуй уарзондзийнади алæмæттаг тухæ.
Ци зæгъдзæнæй нур ба киунугæкæсæг, куд балæдæрдзæй, банкъардзæй аци æнхæст поэтикон уадзимис, нæ æмдогон поэти буцæуæдтæй идзаг философон итигъдадæ?
Тъехти Тамерлан.
Газзет «Северная Осетия». №40, 06.03.2020.